روزنامہ قومی اخبار کے بانی الیاس شاکر
1952-2018
الیاس شاکر عزم و ہمت کا پیکر، ایک نڈر اور بےباک فرد، حالات کے اتار چڑھاؤ کے ایک اچھے شاہد اور تجزیہ کار، سیاسی و سماجی کئی جہتوں کو پیش نظر رکھنے والے صحافی، پیشہ ورانہ قابلیت کے حامل ایڈیٹر، ایک کامیاب پبلشر اور ایک اچھے دوست تھے۔ الیاس شاکر کے قائم کردہ ادارے میں کئی نئے صحافیوں نے تربیت حاصل کی اور اب وہ ملک کے مختلف اشاعتی و نشریاتی اداروں میں فرائض انجام دے رہے ہیں۔ اس طرح قومی اخبار نے پاکستان میں صحافت کے لیے ایک اچھی نرسری کے فرائض بھی سرانجامدیے۔
الیاس شاکر ایک خوش مزاج، حاضر جواب اور بزلہ سنج فرد تھے۔ اپنی زندگی کے آخری برس میں چند ماہ کی علالت کے دوران بھی ان کی خوش مزاجی برقرار رہی۔اللہ تعالیٰ سے دعا ہے کہ مرحوم الیاس شاکر کی مغفرت ہو۔ انہیں جنت الفردوس میں اعلیٰ مقام عطا ہو۔ ان کے اہل خانہ، دفتر کے ساتھیوں، دوستوں اور سب متعلقین کو صبر جمیل عطا ہو۔ آمین
قارئین سے مرحوم الیاس شاکر کے لیے دعائے مغفرت کی درخواست ہے۔